TE KORIMAKO
TE KORIMAKO.
He Nupepa whakaatu i nga rongo o te ao katoa, nga tikanga o Te Whakapono, me
era atu mea.
NAMA 15.] AKARANA, MEI 15, 1883. [TE UTU, 3D.
HE MATE.
TE PAPANUI TAMAHIKI. - Tetahi o nga rangatira o Taupo, i matc i to 19 o nga ra
o Aperira, 1883.
PANUITANGA KI NGA KAI TUHI MAI.
HE maha nga reta a nga tangata Maori e tango ana i TE KORIMAKO kua tae ake he
whakaputa aroha mo te matenga o Te No. Na Matenga Taiwhanga, o Ohinemutu, te
tahi a e ki ana: - "Haere atu e Pa te tangata nana i puta ai he waiora mo te
nei motu mo Aotearoa: - Tuatahi: Ko te manu e korihi haere nei i te ao. Turua:
Aua e kai te Maori i te wai-haurangi kei rori, kei raru, kei pau, nga whenua.
Tuatoru: Kahore he Pakeha i penei me koe o whea, o whea te aroha ki te
Maori."
AMUKETE, O WUANGAPE. - Kei TE KORIMAKO nga utu o nga rarangi taonga.
TAIKIHA, O AHIPARA. - Me panui ki nga nupepa Pakeha ta koutou hiahia kia tu he
toa ki kona.
PETER TE PURU, O NGUNGURU. - He 2s. te utu mo te tau O TE KORIMAKO tukua mai i
te tuatahi.
Ko nga pukapuka katoa mo tenei nupepa me tuhi mai ki a "TE KORIMAKO, kei
Akarana, Pouaka Poutapeta 270."
ALL communications to this paper are to be addressed to "TE KORIMAKO, Auckland,
Post Office Box 270."
Te Korimako.
"Kei te Atua to tatou piringa."
MEI 15, 1883.
Ko nga kingitanga o Oropi, o hea, o hea, e kuraruraru ana, e oho-mauri ana i
tenei takiwa, te take, ko te hunga whakaarokore, me te hunga whakatakotongakau
i roto i tenei iwi, i tenei iwi, e ngahau ana ki te mahi i o ratou tikanga
whakapouri ngakau. Kua putaputa nga panui o etahi, me nga ki-whakahihi kia
patupatua nga Kingi, me nga rangatira whai-mana, kia atea ai nga whenua me nga
taonga ma ratou e ngarengarea nei ki te mahi-whenua, ki te hanga weruweru, ki
te tui tera, ki te rehukowhatu me era atu hanga. He tahutahu ki te paura
tainamaiti nga whare, tae noa ki te tangata te mahi e reia nei e te tini o aua
kai-pehi i te Ture. Mea ai etahi o ratou, me kohuru nga putake o nga ture, kia
kore ai te iwi e whakamana i nga ture, kia pehiarawatia hoki te karakia o te
matua nana i hanga te tangata, nana nei i waiho roa i te ao nga iwi, ahakoa
maia ki te whakatu i te he, ki te whakahinga i te Tika.
Kei mea te tangata e putakekore ana enei whakaatu. He putanga mai no nga reo o
nga rangatiratanga i mohiotia ai, te raununui o enei whakaaro poauau e
toro-haere nei i roto i nga iwi. He ingoa ano to taua iwi i roto i tenei, i
tenei whenua. I Ingarangi, he Peniana (Fenians) tona ingoa; i Parani, he Komuni
(Communists) tona ingoa; i Perehama, he Anaki (Anarchists) te ingoa; i Itari,
he Inahiona (Internationalists) te ingoa; i Tiamana, i Atiria, he Hoharita
(Socialists) te ingoa; i Ruhia, he Naihiriti (Nihilists) te ingoa. Hui katoa
enei mano tini kotahi tonu te tikanga he pehi i te pai, he whakaae i te kino;
he whakahe i te Atua, he whakanui i a Hatana. E puta tonu ana nga hupu kohuru
mo tenei, mo tenei Piriniha, a kaore rawa i kitea tetahi wahi pumaramarama i
enei nga ra, tona mutunga pea he parekura, he pa-horo.
Ki ai etahi ruanuku titiro Karaipiture, kua tae tenei kei te takiwa i poropitia
i te Whakakitenga e ki nei, "I kite ahau i nga wairua poke e toru me he poraka,
i puta mai i te mangai a te kararehe, o te tarakona, o te poropiti-teka. E ki
ana aua tohunga, ko etahi enei o nga tohu i matauria ai kua tata nga ra e hoki
tinana mai ai a te Karaiti ki te whiu i a Hatana ki te pokatorere, me nga
tangata e hapai ana i a ia, he whakahe i nga mea he, he whakatika i nga mea
tika, he whakanoho ki tona taha te hunga Pono, kia Kingitahi me Ia i tenei ao
tonu.
Te Piwha.
KO ta matou Kaituku korero mai mo TE KORIMAKO no Tauranga e kii ana, e maha nga
tangata i mate i te tau kua mahue ake nei i te taru e karangatia ko te piwha
tara te kiri ka whakangoikore tangata) e ae tana kua puta mai ano taua mate i
tenei wa. He kupu kei raro iho nei e whakaako i te tangata ki te ritenga e ora
ai e iti haere ai taua mate ina paangia.
Kei tuku te turoro kia kaukau i te wai matao, mehemea ka hiakai, he raihi te
mea pai, erangi ko tona tino mea e mate ai ia, ko te hiainu, ko te mea tino pai
mona, ko te wai matao, ahakoa nui tukua ma te turoro te whakaaro kia na ano ia.
Kaua te tokomaha e tuku kia noho ki te whare o te turoro no te mea ka he te
turoro i nga
|
