TE KORIMAKO

TE KORIMAKO.
He Nupepa whakaatu i nga rongo o te ao katoa, nga tikanga o Te Whakapono me era atu, mea.
NAMA 16.] AKARANA, HUNE 15, 1883. [TE UTU, 3D.
PANUITANGA KI NGA KAI TUHI MAI.
I ROTO o nga reta kua tae mai nei na H. Kapene Ngatene, te tahi, o te Wahapu, o Waikato, e mihi ana mo te matenga o Te No.
IHAIA TE TAWERO, o Whakatane, me Paratene Ngata, o Waiomatatini, ka hore e ahei to tae a tenei perehitanga.
Ko nga pukapuka katoa mo tenei nupepa me tuhi mai ki a "TE KORIMAKO, kei Akarana, Pouaka Poutapeta 270."
ALL communications to this paper are to be addressed to "TE KORIMAKO Auckland, Post Office Box 270."
PAUITANGA KI NGA TANGATA TANGO I "TE KORIMAKO."
KIA mohio nga tangata tuku moni mai ki te tae nga KORIMAKO ki te 12 heoi ka mutu nga nupepa mo te tau kotahi, ki te hiahia te tangata kia tokua atu ano TE KORIMAKO mo te tahi tau me tutu mai nga panekuini mo te rua hereni, ko te ingoa o te tangata nana te tono kia marama te tuhi.
HE mea atu tenei ki nga tangata tuku tono mai kia marama te tuhi i nga ingoa tangata, kainga hoki. Kua maha nga pohehetanga he kore kahore e mohiotia etahi o nga tuhituhi.
TE 20 o Aperira, i tae mai te reta a Wi Mura, he tono i TE KORIMAKO kia tokua atu ki aia. Ko Auarua te ingoa i tutua mai e ia o tona kainga Ko taua ingoa nei kei te ngaro i a matou Me tuku mai e Wi Mura te ingoa o tona kainga kia ahei ai te taku atu i TE KORIMAKO ki aia.
KUA tae mai nga kupu a Rapana Inia, Renata Pure, Wire Te Tuauru, Hepata Whare, Rapata Kaituna, Wiremu Kohumaru, Kaata Whakarita, kei Kaikohe to ratou kainga me Wi Tawhiwhi o Te Awaroa me etahi atu e kua ana kahore TE KORIMAKO e tae atu ana kia ratou i nga marama ka mahue ake nei. Kua tirohia a matou pukapuka i mahue iho ia Te No a kua kitea i tukua katoa atu ki nga tangata kua whakahuatia nei, nga nupapa te 12 ara mo te tau kotahi.
Kahore nei hoki ratou i tono KORIMAKO mo te tau hou me te rua hereni (2) pane kuini kahore i tukua mai ko te take tenei i kore ai he nupepa KORIMAKO e tokua atu.
Te Korimako.
"Kei te Atua to tatou piringa."
HUNE 15, 1883.
TE tino korero o te motu nei, e hariharia haeretia ana e te ngutu, e whakairoirohia ana e nga nupepa Pakeha, ko te menenga ki te Paramete meake nei tu Ko etahi kei te tautoko i tenei Kawanatanga, ko etahi kei te turaki. Kei nga toa te tikanga; he titiro kau atu ta te mano ki nga wero, ki nga karo, ki nga tu, ki nga hemo, ki nga pakanga-a-ngutu i roto i te Runanga nui, te horonga ra nei o te pa. Ko tetahi mahi ma te Paramete e ai ta te Kawanatanga, ko te turewhakakoaro o te roia i roto i te Kooti Whenua Maori, Mea ai nga Maori, e riro atu ana ki te waha o te parata a papatuanuku haere totara, haere pukatea, haere koromiko, haere rarauwhe, a, oneone tonu, piri ana te tangata, me he paua ki te toka, me rakatauri ki te peka-hahore. Me he mea ka tineia e te Paramete tenei mahi-roia e raweketia nei i roto i nga Kooti Whenua Maori, ka pai hoki. Aua hoki ra te tangata e tito korero mana e, na te roia anake i he ai te Maori i pau whenu ai, i pau moni ai. Me karanga ano te roia ua ana, ka tu ki te Kooti ki te whakakorero te whare. ki te miro i tana nape kia rua, kia toru kume, huka hoki. Titiro kau atu te rau ki nga ngutu e kohekohe ana; nga whakarongo kau te taringa ki nga maarutanga o te reo, ki te tikaatanga, ki nga tiorotanga me nga rupahupahutanga o te reo, hua noa i roto i era hanga, ka tapepa te waewae o te hoa riri, i te auroa o nga pamemetanga, i te taporututanga ra nei. Engari koa kia tae ki te opitotanga o te mahi, ko reira mohiotia ai te tangata, kei te tu-tahanga ia. E ai te ki, " Ma whero, ma mangu ka mau." Kaore kau e eke tenei pepeha ki te ture-roia kaore hoki ua nga tupuna he roia i a ratou, he konatunatu, hei whakarengarenga, hei whakakonukenuke, hei whapenupenu ia Take raua ko Tika. Heoi kua hurihia. mai te whakatopatopa kumara o mua ki te tuara o te roia waha ai e mea nei, " Ko tama te ahu ake, ko tama te ahu iho, ko whiti rau te toki." Kua kaha noa atu te whakahe i te roia ki roto ki te Kooti Whenua Maori e te Pakeha ko nga Maori ia e mitimiti kau ana i te arero, e tangi-aurere ana, a e rere ana mai te tuarea ki te ngakau. Me aha? Kua weto ra hoki nga ahi ka, i te roia.
Ko te rongo nui e hau ana ki nga kingitanga o te ao i naianei ko te karaunatanga o te Epara o Ruhia (Russia) ki tera pa nui ona ki Mohiko (Moscow). Te ingoa o tana Epara, ko Arekahana (Alexander) a, e karangatia ana ia ko te Ha (Czar) a ko ia tonu te reo o Ruhia kahore atu he mana. Mana tonu te ki o te mate, o te ora, mana e whakatu.