TE KORIMAKO

TE KORIMAKO.
He Nupepa whakaatu i nga rongo o te ao katoa, nga tikanga o Te Whakapono, me era atu mea.
NAMA 17.] AKARANA, HURAE 15, 1883. [TE UTU, 3D.
HE MATE.
IHAKA TAKAANINI, - I mate ki Pukaki, i te 9 o Hune, Ihaka, tamaiti a Te Wirihana Takaanini, o Pukaki, Papakura, o na tau e 7.
HIKAPUKU. - I mate ki Waimarama, Hawke's Bay, takiwa o Nepia, i te 9 o nga ra o Hune, a Hikapuku, tamahine o te Waka Pitini, o Waiau Karamaene.
PANUITANGA KI NGA KAI TUHI MAI.
Ko nga pukapuka katoa mo tenei nupepa me tuhi mai ki a "TE KORIMAKO, kei Akarana, Pouaka Poutapeta 270."
ALL communications to this paper are to be addressed to " TE KORIMAKO Auckland, Post Office Box 270."
PANUITANGA KI NGA TANGATA TANGO I " TE KORIMAKO."
KIA mohio nga tangata tuku moni mai ki te tae nga KORIMAKO ki te 12 heoi ka mutu nga nupepa mo te tau kotahi, ki te hiahia te tangata kia tukua atu ano TE KORIMAKO mo te tahi tau me tuku mai nga panekuini mo te rua hereni, ko te ingoa o te tangata nana te tono kia marama te tuhi.
HE mea atu tenei ki nga tangata tuku tono mai kia marama te tuhi i nga ingoa tangata, kainga hoki. Kua maha nga pohehetanga he kore kahore e mohiotia etahi o nga tuhituhi.
Te Korimako.
"Kei te Atua to tatou piringa."
HURAE 15. 1883.
HAU ana mai te rongo o te whakapurerotanga o nga hapu Maori o Ahuriri ki Patangata, ki Omahu, ki Waipukurau, ki Waipaoa, ki Patangata, ki hea, ki hea; te take o te Whakapanukutanga o aua hapu, ko te pananga o te waipiro i ratou takiwa. Me he mea ka waiho ko te Tika hei kaupapa mo nga iwi Maori, tera e haere ake ki te nui, ki te kaha; otiia, ki te whaia nga ara ki te he, ka hekehaere te tupu, tona mutunga ko nga tai o te korekore. Ka pai nga mahi o nga hapu Maori o Ahuriri ki te pana i nga waiwhakahaurangi tangata, ki te toko i era tu ngongi pia pamamao. Ka hapainga kia moiri te kupu whakamoemiti ki a Ngatikahungunu mo tera tikanga pai, ta te mea, he kukume mai ta ratou i te pai, i te ora kia piri, kia tata. Kei whakaaro te tangata e ngakau-kore ana te matua i te rangi ki te hunga tautawhi ki te pai, ki te pono, ki te tika, he manaaki Tana, he tiaki, he atawhai, a, he whakahipa i te he, i te kino, kia kaha ai te whawhai ki nga mea e whakawaia nei te tangata i roto i te ao. Ko te ora mo te tangata kei te Atua; ko te mate mo te tangata, kei te Wairua poke. A, kei te mohio te ngakau o te mano o nga ruanuku Pakeha, ko nga waina, me nga wai-whakahurorirori katoa e ahu ana mai i te Wairua poke, ko ia tonu te papa o era hanga whakaheke i te tupu o te Pakeha raua ko te Maori, a, e mana tonu ana te kupu "Ko te utu o te kino he mate."
Ko Retireti Tapihana kua tae ki Poneke, te take o tona haere na ona iwi ia i tono hei kawe atu i o ratou pitihana ki te Paramete, kia rongo tinana hoki ia i nga ritenga o nga mema Maori. Kia rongo hoki ia i te pire hou a Te Paraihe mo nga whenua Maori. Ko te tono Kooti tuarea mo etahi whenua i whakatara ki Kemureti, kia puta hoki te kupu whakahe ona mo te taha ki tona iwi mo te kawenga atu o nga whenua o etahi wahi ke nei ki Kemureti whakawa ai. Ka hoki mai ia ka tu te hui, kia rongo ona iwi. I nga ritenga i rangona i kitea ranei e ia i tona haerenga ki Poneke.
Paramete.
KEI te mahi i ana haupu Pire nga mema o te Paramete: - Te Pire herehere-a-kararahe, te Pire moni whakaranea-a-Peke; te Pire-a-Pekerapu, te Pire hao ika, te Pire Whenua, te Pire aha, te Pire aha. He hakuku haere te hanga, kowai te tohunga hei whakamohio?
Mate Korera.
Ko tenei mate kua pa atu ki nga tangata o nga taone o Ihipa Ko nga Pakeha noho o reira kiia whati haere, he wehi i taua taru whakarihariha.
Kua tu te Kooti Whakawa Whenua Maori, ki Ohinemutu, hirahira noa atu te tangata kua hui ki reira.
Ka whano ka hanga he wharekarakia ki Kemureti, Waikato, e te Hahi Wetereana.
Ko te tangata Maori o Harataunga Karamaene ko Tapiata Kiwi i haere nei ki Amerika i te tiata hoiho a Koro, kua tuhi mai ki ona huanga e, kei te ora ia, a te raumati hoki mai ai kia kite i tona iwi ia Ngatiporou.