TE KORIMAKO

TE KORIMAKO.
He Nupepa whakaatu i nga rongo o te ao katoa, nga tikanga
o Te Whakapono, me era atu mea.
NAMA 22.] AKARANA, TIHEMA 15,1883. [TEUTU,3D.
HE MARENA.
Ko RATIMA APERAHAMA kua marinatia ki a MARARA, kotiro a Hare Reweti, o Kaitaia, Mangonui, i te 26 o Nowema.
HE MATE.
No te 28 o nga ra o Oketopa ka moe i tana moenga roa ki karatia, a TAHURI, he kotiro, ona tau 1. Haere ana i tana haere, waiho iho te mamae ki nga hunga ora. Nui atu te pouri ki to matou iramutu i whakangaromia nei i te tirohanga kanohi. Na te tupapaku i ki he makuta tana mate. Me he huruhuru manu te rere mai a te ao, na runga ena mai o to Paruparu ra i ahu mai ra koe i taku mea i manako nana nei te tinana i hua waere iho i taku whanaketanga, kai hira tenei ka korou kore ra o roto i ahau ki te whakahauora e kore ra e takoto i roto i te ngakau he hapai roroa waiho ra e kui e roa te tau e huri ai a au he roa i te tirohanga e i. Na TE UWARUNUI.
No te 1 o nga ra o Nowema ka mate ki Kaipara a TE PEKAWHERO, he wahine turoro i haria atu i Kaihu.
No te 10 o Nowema ka moe, ki Te Teko, a KIRIHI, tama a Te Ratuihakara raua ko Mere Te Wharekohuru. Kotahi tau, tango atu ki te rua taua tamaiti.
No te 24 o Nowema ka moe, ki Ranana, Rotorua, a MIKAERE TE KATE TUKUTAHI, me te ahi e toro ana te aroha ki ona iwi. "Kaore te mamae ngau-kino ana roto, ki te makau, e waiho koe ki te pu rangatira," &c. Nga tau i te matenga ai e 56. Haere hoki ra e te hoa !" No te 30 o nga ra o Nowema ka hemo, ki Turua, Waihou, Hauraki, a HARE TE KURI. Haere hoki ra, ekoro, i te ra e whiti ana!
KO HOANA, he tamahine na Puhipi Te Paa tetahi o nga rangatira taitamariki o te Rarawa o te tai hauauru, i mate ki Ahipara, i Tihema 1. I akona taua kotiro i roto i te kura e tu nei ki Ahipara; heoi, kua riro atu ia ki te Atua me tona matauranga nui ko te mamae anake me te konohinohi i mahue iho ki nga matua ki te iwi, ki ona tupuna kia Te Waaka Rangaunu raua ko Akinihi Rangaunu. Haere ra e ko ki to Kaiwhakaora kia okioki koe kia Ia ki Pararaiha. Na R. W. TANGATA.
PANUITANGA KI NGA KAI TUHI MAI.
Ko nga pukapuka katoa mo tenei nupepa me penei te tuhi mai ki "TE KORIMAKO, kei Akarana, Pouaka Poutapeta 270."
ALL communications to this paper are to be addressed to " TE KORIMAKO, Auckland, Post Office Box 270."
KA taia TE KORIMAKO ia marama, ia marama, a ka tukua atu ki nga tangata e tuku moni mai ana, e rua hereni mo te tau. Me tuku mai te moni mo te tau i te timatanga.
PANUI. Ki te mea ka tukua mai kia taia ki tenei nupepa he kupu whakaatu mo te marenatanga, mo te whanautanga, mo te hemonga, o te tangata me takai marire mai te hereni kotahi. He pane-kuini te moni tika.
THE KORIMAKO is to be issued once each month, the price to be two (2) shillings per year postage paid. Europeans wishing to subscribe can do so by addressing ´'TE KORIMAKO, P.O. BOX 270," or by leaving their subscriptions with Messrs. Champtaloup & Cooper, Stationers, No. 76 Queen-street.,
Te Korimako.
"Kei te Atua to tatou piringa."
TIHEMA 15, 1883.
Ko te takiwa e whakanuia ana e nga iwi mohio i te ao, puta noa I nga topito e wha, ko te takiwa o te Kirihimete. Kei reira ta Ingarani; kei reira ta Amerika; kei reira ta Tiamana, ta Ruhia, ta Roma, ta Parani, ta Puruhia, ta Paniora, ta Potukera, me te tini atu o nga rangatiratanga Te taka i nui ai, ko nga ra i whakatangata ai a Ihu te Atua Nui o te rangi: te Tama Kotahi a te Matua. He tatanga, kua tata taua Ra, koia i puta ai te kupu a TE KORIMAKO, kia whakamaharatia e Aotearoa, i runga i te ngakau-aroha, te Ra Nui, i whanau mai ai a te Karaiti, i putawhakarere ai te maramatanga-kehokehotanga i te Rangi, i tau ai te rangimarie-whakamiharo ki te Whenua, me te Rongo-Mau ki nga tangata katoa.
KA whano ka tae tenei ki te mutunga o nga tau e rua, i koroki-haere ai tenei manu whetau ki nga whakatenetenetanga, me nga taporetanga o Aotearoa; peka atu he kainga, peka atu he kainga, he whai i etahi pitopito kakano kia karawhiua mai ki roto ki taua wahi kono. He hautete noa te hanga he komemememe te hanga; he whakatangitangi te hanga; he whakahiakai tonu te hanga, aue! hei aha ma te tini, ma te mano, ma nunui ma, ma maruwehi ma, ma marutuna ma! Me he mea i ihupukutia e te manu nei tana hemo-kai. rere-rukaruka atu ai ki nga hau puanuanu o te po, ehara i te motu nei tena hei engari, he whakamomori marire tena na TE KORIMAKO i a ia ano. Tena ko tenei; hono tonu, hono tonu te tangi ki te motu, mo te mate rawa atu o tenei nupepa, kua poturitia nga taringa i te marama, i te mararna; a, kua ahua penei te mahara o te ngakau: "Ae hoki pea, kua turi nga taringa o Aotearoa, kua utongatia te ngakau." Ina hoki ra, kua oti te whakahuihui e te Pakeha nga Maori o te Motu; a, kitea ana, e 40,000 tangata; tuma. Na! i roto i enei whatekau mano Maori ko nga tangata i tarapeke mai ki te whangai i TE KORIMAKO e 765 tangata. Ko te nuinga e whakahawea ana, e whakangoikore ana i a ratou ano, titiro-whakatau mai ana, e whakanene mai ana, e whakakaitoa mai ana. Kati, ka hurihia ki te tua te 39,000 Maori e whakatiki nei i ta ratou manu; ka huri te mahara ki te 765 Maori e raranga mai nei i te putea-whakairo, i te whiri-rua, i te pohewa, i te paro, i te poti-rua, i te tini noa iho o nga pukoro hei kohi, tawa, kopi, taraire, koroi, titoki, aha, aha, kia ora ai te manu e whakaahurutia ana e ratou. No