Te Korimako

He Nupepa whakaatu i nga tikanga o te Whakapono, nga Rongo o te Ao katoa, me era atu mea.

AKARANA, APERIRA 15, 1884.

NAMA 26.

TE UTU, 3D.

MATENGA TANGATA.

No te 17 o nga ra o Maehe 1884, ka moe ki Uawa to matou tupuna ariki, a PAORA RANGITUTU. Toko ake ana te aroha o nga iwi ka a ia. Ko te Karaiti tona huarahi i haere ai.

THE KORIMAKO is to be issued once each month, the price to be two (2) shillings per year postage paid. Europeans wishing to subscribe can do so by addressing " TE KORIMAKO, P.O. Box 270," or by leaving their subscriptions with Messrs. Champtaloup & Cooper, Stationers, No. 76 Queen-street.

Te Korimako.

"Kei te Atua to tatou piringa."

APERIRA 15, 1884.

KAORE mai ko te papai o nga hamumu a te Kawana ki nga iwi, i a ia e taki-haere ra, ki tenei wahi, ki tera wahi o Aotearoa. He hua i kitea e nga Maori i roto i nga whai korero te Kawana. I whakahau i nga Maori kia pakaha ki te mahi;ki te ahu-whenua, ki te whakarangatira i nga marae; ki te whakapai i nga huarahi; ki te whakatupu i nga rakau hua; ki te ata tiaki i nga moni; ki te tiaki tika i te tinana; ki te whangai i te wairua ki nga hua o te pai; ki te ako ki te tohutohu i nga tamariki; ki te tuku i nga mea e pouritia ana ki te Paramete; ki te whakamutu i nga hauatanga i te waipiro. Nga whenua i haere ai a te Kawana ki te whakaatu i enei ritenga pai; enei ritenga, whakanui-tangata, ko Kawhia, ko Hokianga, ko Mangonui, ko Whangarei, ko Tauranga, ko Ohinemutu, ko Te Wairoa, haere mai ki Waikato, Hauraki ki Kauwaeranga, ki Ohinemuri. Ko te pu-aroha te taonga e toko ake ana i te ngakau ina rangona nga akoranga-pai o tenei hanga, o te Whakatuatea. He tangata ata whakaaro o a te Kawana, inahoki te tika o nga korero ki nga tini iwi, Maori, i ona rerenga ki nga awa me nga kokoru o te motu, me tona kokenga-haeretanga ra uta. Ko ta TE KORIMAKO kupu tenei, me kohi ki roto ki te putea o te ngakau nga kupu a te Kawana, hei taonga, hei whatu, kia kaha ai te pupuru i nga hanga nunui, kia hurihia ai ki te tua nga hanga iti, e whakamokai nei i a taua.

Te Kawana.

TE ahunga atu o te Kawana o Niu Tireni i Kawhia, ka u ki manuka, rere tonu a Tokerau ki te whai-korero ki nga rangatira Maori o reira; rere tonu a Tauranga, ka haere i uta ki Potorua, ki Te Wairoa-Tarawera, a, Rotomahana. Hoki mai i reira na Waikato, a Akarana. Nui atu te whakapai a nga Maori me nga Pakeha ki te Kawana; he pai, he tika no ana hamumu.

Te Kawana raua ko Tawhiao.

No te 1 o nga ra o Aperira nei, ka kareretia a Tawhiao e te Kawana, a, haere atu ana ki tona whare i runga ake o Waipapa. Nga tangata o te haere, ko Tawhiao, ko Topia Turoa, ko Patara Te Tuhi, nga Pakeha, ko Hare Reweti, ko Te Pereama. Ka oti nga mihi, ka noho ki nga turu; karanga tonu ake a te Kawana ma Hare Reweti e whakareo Pakeha, e whakareo-Maori a tatou korero, whakaaetia ana. Oho tonu ake a te Kawana, "Haere mai, haere tonu mai. Tenei te koa nei te ngakau, na te mea ka tae mai koe ki a au; ka kite ahau i a koe. I nuamua ake nei, ka tae atu a au ki Areka, heoi, na a matou nei rorerore te tae atu ai ahau ki Whatiwhatihoe. Ko tenei, kua tae mai koe kua kikite taua i a taua, nui atu taku pai. Kua tae ake ki ahau te ki, e haere ana koe ki Ingarangi. Haere i runga i te waimarie. Haere kia kite koe i era nga whenua i era iwi; i tera pa nui i Ranana, me ona mano tini tangata. Tera e whakamanu whiritia koe e nga Tauanui o tawahi. Noku tera kainga a Ranana, i nga tau erua tekau. Tera pea, e pataia koe, " I kite ra nei koe i a te Kawana? " Mau e ki atu " Ae, i kite ano a au a kei te ora." I a koe ka rere nei tera e kite koe, i Poihakene, i Merepone, i Atene, i te Moana Whero, i Mata, i Hipirata; a, tera koe e miharo ki te tini o nga mea hei tirohanga kanohi. Haere e hoki ra e hoa i runga i te pai. Ka hamumu ake a Tawhiao: - "Tenei te whakarongo nei, tenei te koa nei, ki au hamumu. Ko koe i koa, ko ahau hoki i koa mo taku taenga mai nei. I koke haere a au i te motu nei, kaore koe i kitea e ahau; a, kua tupono taku kite i a koe, i te mea ka whano ka manu ki te