Te Korimako

He Nupepa whakaatu i nga tikanga o te Whakapono, nga Rongo o te Ao katoa, me era atu mea.

NAMA 31.]

AKARANA, AKUHATA 15, 1884.

[TE UTU 3D.

PANUITANGA KI NGA KAI TUHI MAI.

Ko nga pukapuka katoa mo tenei nupepa me penei te tuhi mai ki "TE KORIMAKO Pouaka 270 Poutapeta, kei Akarana."

ALL communications to this paper are to be addressed to " TE KORIMAKO, Post Office Box 270, Auckland."

THE KORIMAKO is to be issued once each month, the price to be two (2) shillings per year postage paid. Europeans wishing to subscribe can do so by addressing " TE KORIMAKO, P.O. BOX 270," or by leaving their subscriptions with Messrs Champtaloup & Cooper, Stationers, No. 76 Queenstreet.

Te Korimako.

"Kei te Atua to tatou piringa."

AKUHATA 15, 1884.

HE tini nga nupepa o Ingarangi e whakaputa ana i te kupu whakanai mo Tawhiao ratou ko nga hoa, i a ratou e noho mai nei, e mahi mai nei i Ranana (London). I na te Moana Whero te ahunga atu o Tawhiao; a, ko te hokinga mai ki Aotearoa, ka na Amerika, e ai te ki a nga nupepa. I te taenga atu o Tawhiao, na nga Tauanui, na nga Whakatuatea i karanga ki uta. Na te Runanga Tiaki Iwi i whakanui i te tuatahi; a, i muri iho ka whakanuia e Roori Tape (Lord Derby) me era atu rangatira whai-mana o te Kawanatanga. Muri iho na Kuini Wikitoria i whakanui, i te karangatanga ai kia haere atu a Tawhiao kia kite i a ia, i a te Kuini i tona whare ake. He whakahonore nui tenei na te Kuini i a Tawhiao; a, puta ana te kupu whakapai o te mano ki a te Kuini, mo tana kumenga atu i a Tawhiao, kia kite, kia aumihi i runga i nga tikanga o nga Kuinitanga. Tetahi iwi nana i whakanui a Tawhiao i Ingarangi, ko te Ope o te Puru Ripene. Haere ake te hapu nana a Tawhiao i karanga ki ona wharehuihui, e whitu te kau mano tangata. Utneretia ana a Tawhiao ma e taua iwi; a, panuitia ana ki nga nupepa nga pine hiriwa, me nga Puru Ripene e mau ana i nga koti o Tawhiao, o Patara Te Tuhi, o Te Wheoro, o Topia Turoa, o Te Ropiha. Aha ! whakamoemiti tonu nga rangatira Pakeha, me te mano mo ana tohu hiriwa me nga puru ripene i pinea ki nga kakahu o te Kingi Maori ratou ko nga hoa. Tetahi iwi o Ingarangi nana a Tawhiao ma i whakanui, ko te Runanga Minita o nga Hahi karakia. Whakatapokoria ana a Tawhiao ma, ki tenei whare-karakia, ki tera whare-karakia. Ko nga okena tena, ko nga waiata tena, ko nga inoi tena, ko nga kauwhau tena, Tetahi iwi i matenui ki a Tawhiao ma, ko nga mema o te Paramete o Ingarangi, kawea atu ana a Tawhiao ma ki ana whareruanuku, ki nga whare-Paramete, matakitaki ai, whakarongo ai.

Akuanei pea te pataia ai, " Heaha ra te tukunga iho o enei hanga ? Heaha ra te kai e whara i enei umeretanga, i enei whakanuinga i a Tawhiao?"

Waiho ra, mata, ma te taringa e whakarongo i roto i nga ra, ki nga hua e ahu ana mai i nga whaikorero a Tawhiao, i nga pitihana, i nga aha, i nga aha. Kei te hokinga mai pea te matauria ai nga hua o te haerenga a Tawhiao ki te whai i te matapuna o nga tikanga nunui.

HEOTI te tikanga i runga i te mahi Paramete i naianei, ko te kanohi me titiro atu, ko te taringa me whakarongo. Ko nga mema hou kua uru ki tenei Paramete i te taha Pakeha, 34. Ko nga mema hou a te Maori, e 3 - ko Ihaka Te Tai, ko Te Puke, ko Wi Pere. Mawai e kite nga tikanga ka whano nei ka mahia, kei nga pumohio ki era hanga te whakaaro, nga korero-tu, nga korero-wene, nga korero-puhae, nga korero tamatane, tama - wahine hoki. E mahi e Tauanui ma i a koutou tikanga.

Nga Mema Maori kua tu mo te Paramete Hou.

Ko nga mema Maori tokowha kua tu nei i te pooti hei whakaaere tikanga mo te taha Maori, koia enei:

Ko Taiaroa, mo Aropaoa

Ko Te Puke, mo Aotearoa ki te taha Hauauru

Ko Wi Pere, mo Aotearoa ki te taha ki te Rawhiti

Ko Ihaka Te Tai, mo Aotearoa mo te taha whakararo katoa.