TE KORIMAKO

He Nupepa whakaatu i nga tikanga o te Whakapono, nga Rongo o te Ao katoa, me era atu mea.

NAMA 35.]

AKARANA TIHEMA 15. 1884.

[TE UTU, 3D.

MATENGA TANGATA.

No te 16 o Nowema, 1884, i te wiki i te 5 o nga haora i te ata ka moe a HONE WIRIHANA MANIAPOTO, ki Whangamata. Nate Atua i homai nana ano i tango atu.

No te 24 o Hepetema, 1884, ka moe ki Te Awahou, Rotorua, a TE RETIMANA PORAUMATI, kaumatua, a, he nui te mamae i mahue iho ki nga ngakau o ana tamariki i tona rironga atu ki tera ao; otiia, riro rawa atu tenei kaumatua o Ngatirangiwewehi, hapu o Te Arawa, kua maha ke ana uri i mahue iho i a ia, hui katoa e 21 e ora nei. a, ko tana tamaiti whakapakanga, ko Te Retimana Poraumati, tamaiti, kei roto i nga Tari nunui a te Kawanatanga, ara, kei te Tari Tumuaki o nga Tari Kooti Whenua Maori. i Poneke.

PANUITANGA KI NGA KAI TUHI MAI.

Ko nga pukapuka katoa mo tenei nupepa me penei te tuhi mai ki `'TE KORIMAKO, Pouaka 270 Poutapeta, kei Akarana."

ALL communications to this paper are to be addressed to " TE KORIMAKO, Post Office Box 270, Auckland."

THE KORIMAKO is to be issued once each month, the price to be two (2) shillings per year postage paid. Europeans wishing to subscribe can do so by addressing " TE KORIMAKO, P. O. Box: 270," or by leaving their subscriptions with Messrs. Champtaloup & Cooper, Stationers, No. 76 Queen-street.

TE KORIMAKO

TIHEMA 15, 1884.

Ko te toru tenei o nga tau i tipi-haere ai a TE KORIMAKO ki te kawe atu i nga o mo rau-iwi, mo rau-tangata. Ko te pai tenei o nga iwi, ko te whiu mai i nga kono kahikatea hei oranga ma tenei manu Maori. Kei tawhiti rapea u a te motu nga "hua o te tau" e karawhiua mai nei i nga tau e toru; a, ma nga puwhakaaro e ki, i tika ra nei, kahore ra nei nga whakautu mo nga hereni i kokiritia mai e nga nui o Aotearoa. I roto i enei tau, ka mate ko Te No (Mr. Snow), te hoa aroha, nana nei tenei wahi manu i tuku kia rere; a, heahakoa kua koeketia te kai whakaputu o TE KORIMAKO, whakauaua tonu ki te hapai i ta Te No, kia porotutuki ai ki te wa e mohiotia ana. Ki te ora tenei manu, ki te ora; ki te hinga, he hinganga pewhea ta te rakau iti? Nau i aha u au? Na take mai ano te tikanga. E takoto ana te pepeha, "He iti whiwhia." Ko etahi tikanga na Hiriwa raua ko Koura i tautoko; na te aroha e toko ake ana i te ngakau, te kai tautoko o tetahi taha. Heoi, ka toru nga tau o te aroha; a, akuanei pea te matapopore ai, te rere-wharoro ai ki runga ki te ara moni. Ko te kai-kino nei tena; kei kona te whakangutungutu, te whakatiotio, a, te whakahawea pea. Waiho ra mata, me tatari ake ki te peheatanga-ki te heruherunga ra nei o nga huruhuru o ta tatou mokaikai, ki te maunutanga ra nei o te kururemu.

Kua whakahau te Epara o Haina kia kotahi te kau ma rua manuwao me rere atu ki Homoha (Formosa) kia pakangatia nga kaipuke o te Wiwi kei reira.

Haere ake nga hoia kua tukua atu ki Huru (Zululand) hei papaki i nga Poea (Boers), e waru mano hoia.

Ko nga hoia o Ingarangi kua oti te kautere atu ki Ihipa hei tau i a Te Mari (Mahdi). e 8,000.

Te Hemara Tauhia.

No runga i te mahara nui a tenei hanga, a te rangatira, ka whiua noatia he kono karaka hei kai ma te manu nei, ma TE KORIMAKO. Engari koa, ko nga rangatira Maori e tautoko nei i teuei wahi manu, e ki ana, kia rua, kia toru kapakapanga o nga harirau i roto i te marama kotahi. I a TE KORIMAKO e taiawhio ana ka roa, a karanga mai ana etahi manu, " Ka i te kai, ka kawa te kai, ka whakarere te kai."

Meiha Kepa Tautoko.

I MUA ake nei ka puta te kupu o nga nupepa Pakeha, ko Meiha Kepa i pana atu i nga runanga o te ropu whakahaere ture-Kuini, he aha ra nei te take; i enei nga ra, e ki ana nga nupepa, kua aratakina mai e Te Paranihi, minita Maori, ki roto ki te kahui o nga Kahu-pokere o te motu nei. Kaore i te rahi te manu nei, engari koa, he manu Maori, koia i puta ai tana whakatapatapa mo Te Kepa i whakahokia mai nei ki te hapai i tana kahukura. Ko te tika ano ka tika, e ai ta tenei manu paku: - " Pouri, pouri; potango, potango; hakere, hakere; hakere ra i mau ai te tieke; e tu-tai ana, e - , e ma-tai ana, e - , ka eke, ka eke; kei runga, kei runga; kei te toropuke, e, e, e, e, i." Kua haere taupuhipuhi tenei, a Meiha Kepa raua ko Te Paranihi. Kua maene mai nga tiotio, me nga whakatenetene o mua ake nei. Ka rawe; ka pai.