TE KORIMAKO

He Nupepa whakaatu i nga tikanga o te Whakapono, nga Rongo o te Ao katoa, me era atu mea.

NAMA 37.]

AKARANA, PEPUERE 16, 1885.

[TE UTU, 6D.

MATENGA TANGATA.

No te 26 o Tihema, 1884, ka wehea atu toku hoa wahine, a MAKARETA KEPA HORO, ki Te Kao Parengarenga. No te 6 o nga haora i te ahiahi o taua ra i wehe ai tona wairua i tona tinana waihotia iho ko ana potiki ki te ao o to kino, kua whakawhiti atu ia ki to ao okiokinga o te wairua I te patainga a Hemi Kapa. kaikauwhau, e mohio ana koe ki te Kaiwhakaora ? Ae, ko te Karaiti, ko te Tama, a te Atua o nga rangi. E mohio ana koe ki te ara e haere ai koe? Ae, ahakoa haere ahau i te a waawa o te atarangi o te mate kahore he kino e wehi ai ahau, notemea kei toku taha koe, ko to rakau me to tokotoko ko ena hei oranga ngakau moku. E whitu haora i muri i tenei ka moe, ona tau e 25. He uri rangatira tenei wahine no te Aupouri. Haere atu ra e hoa waihotia iho ko te roimata. Na Ihowa i homai, na Ihowa i tango atu kia whakapaingia te ingoa o Ihowa. - Na tona hoa taane na Kepa Horo i tuku mai.

PANUI KI NGA KAI-TAUTOKO.

Ko te utu mo TE KORIMAKO inaianei, e wha hereni (4s.) mo te tau. He mea tuku noa atu te tukunga atu ki to Poutapeta. Ko nga moni me toku tuatahi mai.

NOTICE TO SUBSCRIBERS.

THE price of TE KORIMAKO is four shillings (4s.) per annum, post free. Subscriptions are payable in advance.

PANUI KI NGA KAI-TUHI MAI.

Ko nga pukapuka katoa mo tenei nupepa me penei te tuhi mai ki "TE KORIMAKO, Pouaka 270, Poutapeta, kei Akarana."

ALL communications to this paper are to be addressed to " TE KORIMAKO, Box 270, Post Office, Auckland."

TE KORIMAKO

"Kei te Atua to tatou piringa."

PEPUERE 16, 1885.

Ko te tikanga i whakamaiangitia ai te taone o Akarana i naianei, ko te mahi o Te Putu ki te whakanui i tera Ture pai, i te Puru Ripene o te Whakapono. Makari ake nei te pito o te taara i kuhua mai ki Akarana i mumua ake nei. I mirohia e nga pu-tohunga o taua mahi, a, i tenei ra, kua rua, kua toru kume te roa. Na te mohio o Te Putu Tumuaki o tera hanga tetahi wahii engari ko te tino take o te hurihanga mai o nga mano, ki tenei huarahi mataatika, na te Wairua Tapu i taki i tohutohu, i whakamarama te ngakau. Auaka te tangata e ki, e take kore ana te kino rana ko te pai. He take nui ta tetahi, ta tetahi. Te take o te pai, ko te Atua. Te take o te kino, ko Hatana. Na! ekore te tangata e whiwhi noa ki te kino, me whai marire, ko reira whiwhi ai te tangata ki te kino, a te takunga iho, he mate. Koia hoki ko te pai, me whai marire katahi ra ano tera taonga ka taea e te ngakau; a, ko te tukunga iho o tera hanga he ora, - he ora mo te tinana, he ora mo te wairua. Me he mea he aurara noa mai a kino ki te tangata, ka kiia, no hea e taea te pana atu; tena ko tenei, he rere-wharoro ta te tangatata ki te kino, kauaka e kiia na te kino te he, na Hatana te hei kahore, na te tangata tonu te he, na te tangata tonu, tonu, tonu. Rere mai ai koia nga wai-whakahaurangi ki roto ki te korokoro o te tangata ? Hua atu he mea totoro e te ringa; a, ko te ringa hei hapai ki te waha, a ko te waina hei whakapohaha i a ia ano, ka rere ai na te korokoro ki te poho. E ai te pepeha, " He ngakau tangata e whakaaro ana," engari pea, he mea kopare nga kanohi i kore ai e kite i te he-whakahara o enei tu mahi, e whakaheke nei i te tupu o te tangata. Koia nei nga huanui o te whanoke, o te wairangi, o te whakaaro-kore, o te paraheahea, he tango noa atu, he kai noa atu, he inu noa atu te hokinga mai, horerawa he taimamatanga o te ngakau, i te mea e noho ana i a matangurunguru rana ko taimaha - rukiruki. Tena ra to hanga i ta te tangata whakahe i a ia ano. Heoi, kua taimama pea tenei i te mahi Puru Ripene a Te Putu, inahoki ko nga tangata o Akarana i huri mai nei ki te tango Puru Ripene i Akarana, e toru mano e rima rau tangata. Ko nga tangata whai whakaaro kei te whakapai i tenei hanga nui; a, kei te whakanui i a Te Putu mo te uekaha o tana tikanga whakapurero ake i te taone o Akarana.

Ko te mea nui e uhungatia ana i nga rangi nei e Ingarangi (England), me nga tini Koroni (Colonies) ko te horonga i a Te Mari (Mahdi), o Katouma (Khartoum), i Ihipa (Egypt). Ta te Kuini tangata-rangatira i noho i roto i tera pa ko Tienara Korano (General Gordon) ki ai nga nupepa he toe taua tangata, he tini nga hinganga o nga ope o Te Mari i taua Tienara. Heoi, no te horonga o Katouma, haere atu ana i te herehere taua rangatira. Tae rawa atu te ope hoia o te Kuini (Queen) i te 28 o Hanuere nei hei tuara mo Tienara Korano, kua horo noa mai te pa i te 26 o Hanuere; a, pito iti i ora ai a Ta Hare e Wirihana (Sir