Te Korimako.

He Nupepa whakaatu i nga tikanga o te Whakapono, nga Rongo o te Ao katoa, me era atu mea.

NAMA 41.] AKARANA, HUNE 15, 1885. [TE UTU, 6D.

PANUI KI NGA KAI-TAUTOKO.

Ko te utu mo TE KORIMAKO inaianei, e wha hereni (4s.) mo te tau. He mea tuku noa atu te tukunga atu ki te Poutapeta. KO nga moni me toku tuatahi mai.

NOTICE TO SUBSCRIBERS.

THE price of TE KORIMAKO is four shillings (4s.) per annum, post free. Subscriptions are payable in advance.

PANUI KI NGA KAI-TUHI MAI.

Ko nga pukapuka katoa mo tenei nupepa me penei te tuhi mai ki "TE KORIMAKO, Pouaka 270, Poutapeta, kei Akarana."

NOTICE TO CORRESPONDENTS.

ALL, communications to this paper are to be addressed to "TE - KORIMAKO, Box 270, Post Office, Auckland."

PANUITANGA.

Ko nga rua hereni (2s.) katoa e tukua mai ana timata mai i muri i te 15 o Hanuere, 1885, ka tukua atu te nupepa mo nga marama e ono. E koutou e nga tangata kahore e tae atu ana a koutou nupepa me whakaatu mai kia tukua atu ano tetahi.

PANUITANGA.

HE whakamahara tenei ki nga hoa-tuhi mai kaua e tukua mai he hiriwa, he koura ranei ki roto i a koutou reta anga mai ki TE KORIMAKO, notemea ka weeteria e te Poutapeta a ka rire atu i a ia tetahi wahi o te moni Erangi me tuku mai i te panekuini, te nooti, i te tieki, i te moni-oata-waea ranei.

TE KORIMAKO

"Kei te Atua to tatou piringa."

AKARANA, HUNE 15, 1885.

Ko tenei whakatauki a te Pakeha, "i muri o te awha ka tae mai te marino i muri mai o te rangi kapua-hinaki-pouri ka rere mai nga hihi o te ra." Kua tika rawa enei kii, inahoki ko nga ngaru i kiia e kawe ana i nga anuao ki nga wahapu o ia whenua o ia whenua hei titiro hei arai i nga tini kaipuke o Ruhia e anga ana kia puta ki te nuinga o te ao haere ai. Ko tenei- mahi o te Ingirihi kua oti a kua marino te ahua o tenei huarahi, ko nga kare kua mutu te hurihuri te kopiupiu. Na ko tenei patai e ahu mai ana ki o tatou whakaaro. E puta ranei te hohou-rongo ? e kore pea tenei pea e tino rite te utu, notemea kia tatou nei ko nga tino kai o tenei ngarahu kei a Ruhia, notemea kahore ano ratou kia hoki atu ki waho i nga rohe o Awhekanitana, na konei ka mataara tonu a Ingarangi ki taua iwi. Mehemea ka tohe a Ruhia ki te whawhai tenei a Ingarangi kei te tatari i runga i tona whai-kaha me tona manawanui hoki. Kei runga ano i te moana ona tini kaipuke me ana heramana tini whaaioio, ko nga ope hoia o ana tini whenua i nga waahi o te ao, ano ka tangi te tetere ka rere mai i runga i nga parirau o nga tini manu e tatari ana ki nga tangata e mataara tonu ana ki te awhina i to tatou whenua, ka tika tonu atu ki ia waahi ki ia waahi e maanu ai e rere ai te kara o to tatou kuini, horerawa e puta te wangawanga, me he moana ka haere tonu mai ka haere tonu mai horerawa e taea te whakahoki, kia ngaro ra ano nga tahuna o te hoa-riri, ko tatou nei, e kite kau i nga kare o nga ngaru e taka-awhiowhio ana, ka rongo ano pea i nga parikarangaranga o te whawhai e rere mai ana i runga i nga keokeonga o te huarahi tae noa mai ki Aotearoa. Ma te Atua anake te kii, kaati, aua rawa o ngaru whakapehapeha e tukua kia rere noa, ko ahau te kai-arai ko ahau te kaitiaki o nga iwi katoa e piri ana ki ahau. Ko tera whenua ko Kanata (Canada) kua paimarire, ko te kai-whakaoho (ko Riara) kua hopukia, akuanei pea ka tau te taimahatanga o te ture ki taua tangata. E pai haere ana tera whenua a Awherika, otira he nui noa atu te mahi ma te tangata, ki te whakararata i nga tini iwi maka o taua whenua puta noa puta noa, ma reira ka tere haere ai te mohiotanga me te matauranga, e kite ai nga tangata katoa (ahakoa mangumangu, ahakoa he kiriwhero, ahakoa he Pakeha) i nga mea e tau ai te koa me te rongomau kia ratou.

Te Piriniha o Weera.

KUA tae mai nga rongo korero e mea ana tera pea e puta te hiahia o te Piriniha te tama mataa-mua a Kuini Wikitoria kia kauria mai e ia te moana tuauriuri, kia kitekite i nga koroni (i raro i te mana o tona whaea), ara i Atareiria me tenei motu me Aotearoa. Mehemea ka pono tenei haere mai o te Piriniha, tera e karangatia, e powhiritia, e nga iwi o tenei motu hei whakanui i tona taenga mai.