TE KORIMAKO.

He Nupepa whakaatu i nga tikanga o te Whakapono, nga Rongo o te Ao katoa, me era atu mea.

NAMA 55.] AKARANA, HEPETEMA 16, 1886. [TE UTU, 6D.

MATENGA TANGATA.

No te Paraire, te 13 o nga ra o Akuhata, ka mate ki Peria, Mangonui, a WAATA RAKENA WI KAITAIA, he tamaiti na R. W. Kaitaia, tetahi o nga rangatira o Ngapuhi. Ko tana tamaiti i whaka. akona ki te kura i Peria, a no tona paahitanga i te uiuitanga-matauranga, ka tukua mai ki te kura i Tipene. Akarana. E ma nga tau e kura ana ka paangia e te mate, ko tona hokinga ki te kaainga, a kotahi marama e noho ana i reira ka mate. He tamaiti pai, kahore rawa he tutu i a ia e noho ana i te kura. He tamaiti whakarongo ki te ako a ona matua, a ona hoa i te kura. He ngakau maarire, kahore rawa he kupu kino e puta ana i tona mangai. Waihoki tae mai ana te aroha me te pouri ki ono hoa e noho nei i te Kura i Tipene. Ehara i te mea ko ia anake te mea i nui ai te pouri-tanga ki te whanau a Wi Kaitaia, no te Wenerei hoki o tana wiki ano, ka mate hoki tetahi o ana tamariki, tetahi o nga mea iti. A kotahi ano poka i tanumia ai rana. He nui rawa te pouri me te aroha ki tenei whanau i runga i tona aitua. I te matenga hoki o Waata, i marama tonu ona whakaaro, i karanga ano ki tona Ariki kia tangohia atu ia i tenei ao.-Na Raureti Mokonuiarangi i hoatu i runga i te aroha ki to tona hoa kia Wi Kaitaia.

PANUITANGA.

Ko nga rua hereni (2s.) katoa e tukua mai ana timata mai i muri i te 15 o Hanuere, 1885, ka tukua atu te nupepa mo nga marama e ono. E koutou e nga tangata kahore e tae atu ana a koutou nupepa me whaka-atu mai kia tukua atu ano tetahi.

PANUITANGA.

Ko te mea tika rawa me whakarite e nga kaitautoko, he Pakeha e mohio ana koutou i o koutou takiwa, hei taunga atu mo a koutou nupepa. A me tuhi mai te ingoa o te Pakeha kia mohio ai matou hei tukunga atu mo te nupepa. Me korero ranei e koutou ki nga Poutapeta i o koutou takiwa, kaua a koutou nupepa e hoatu ki tetahi tangata. Ko nga reta me nga panui katoa e tukua ana mai kia taia ki TE KORIMAKO, kia marama te tuhi-tuhi, kia pai te wehewehe o nga kupu. Me tuhituhi nga korero ki te taha kotahi o te pukapuka.

PANUITANGA.

HE whakamahara tenei ki nga hoatohimai kaua e tukua mai he hiriwa, he koura ranei ki roto i a koutou reta anga mai ki TE KORIMAKO, notemea ka weeteria e te Poutapeta a ka riro atu i a ia tetahi wahi o te moni. Erangi me tuku mai i te panekuini, i te nooti, i te tieki, i te moni-oatawaea ranei.

PANUI KI NGA KAI-TAUTOKO.

Ko te utu mo TE KORIMAKO inaianei, e wha hereni (4s.) mo te tau. He mea tuku noa atu te tukunga atu ki te Poutapeta. Ko nga moni me tuku tuatahi mai.

NOTICE TO SUBSCRIBERS.

THE price of TE KORIMAKO is four shillings (4s.) per annum, post free. Subscriptions are payable in advance.

PANUI KI NGA KAI-TUHI MAI.

Ko nga pukapuka katoa mo tenei nupepa me penei te tuhi mai ki "TE KORIMAKO, Pouaka 270, Poutapeta, kei Akarana.

NOTICE TO CORRESPONDENTS.

ALL communications to this paper are to be addressed to " TE KORIMAKO, Box 270, Post Office, Auckland."

Te Korimako.

" Kei te Atua to tatou piringa. "

AKARANA, HEPETEMA 16, 1886.

Ko te marama tenei a whakaaro ai tatou ka puta mai te ua me te whatitiri. Ehara i te hanga te rite o enei whakaaro, kua kitea e tatou nga mahi e puta mai ana i te rangi, ko nga pokaka te whatitiri me te ua, i nui rawa enei taonga i tenei wa, neke ake pea i nga tini tau kua mahue haere i to tatou oranga, i runga i enei hanga i puta mai te makariri, te kopeke te tukunga iho ko te wharo ko te kiri-kaa me nga tini mate i ngakia e tenei ahua o te rangi. Waihoki e noho taumarumaru ana te kapua o te aitua o Rotorua, tenei nga tangata o reira te noho rawakore nei. Na te aroha o te Kawanatanga me nga tini iwi Maori, me o ratou hoa-Pakeha, i ahua mama ake ai tenei mate-nui i tau nei ki a ratou. Na e tumanako, ana ta koutou manu ka huri ano koutou ki nga huarahi o te ora, notemea kua puta te kowhai, penei ka huri ano koutou ki te whakato i nga kai ki te mahi i nga maara kia whiwhi ai koutou i nga oranga e tika ai koutou mo te tau e haere ake nei. Kei mea koutou ko koutou anake te iwi kua paangia e te rawakore. Titiro ki nga tini Pakeha e noho ana i runga i te kore mahi me te mate-kai. Titiro ano ki nga rongo o nga ruwhenua e haere tonu mai ana i ia waahi i ia waahi o te ao, me te mate o nga tini tangata i era tu aitua. I te paunga o nga ra o Akuhata i tae mai ano te rongowaea kua puta te ruwhenua ki Piriatera, he taone no nga Kariki, a i nuku atu i te toru rau nga tangata i mate, me te tini noa atu i whara i te pakarutanga o te whenua, horo