E kore matou e ahei ki te ta i nga korero kahore i whakaaturia mai te ingoa o nga kai- tuku mai. Mehemea kahore te tangata e pai kia whakaaturia tona ingoa, me tuhi mai ki a matou, ko matou kia mohio ki tona ingoa ki tona kainga.

E pouri ana matou mo te tukunga atu i te awhi whero.ki nga tangata kahore nei i tika kia tukua atu. No nga kai-whakapiri te pohehe, otira e nga hoa kaua e mamae, he whakaatu kau, ehara i te whakawehi.

I korero mai o matou kaumatua ki to matou he mo nga kupu mo Kingi Mahuta i roto i te NAMA 32. Ko aua kupu ehara i a matou engari na nga mema o te Paremete, heoi ta matou ko te whakarapopototanga i aua korero ko te whakaae hoki he tika. He tamariki e nga hoa, kei te ako tonu.

E hiahia ana matou ki te whakamahara ki nga kai-tautoko kia tohu i a ratou pepa, hei te mutunga o te tau ka whakapukapuka ai, hei tirotiro hei ketuketu a nga ra e tu mai nei. Taihoa ka taia e matou etahi korero pai atu, mo nga mate e pa mai ana ki te tinana o te tangata, mo te ahua hoki o te tiaki turoro, me era korero e tika ana kia tohungia. Ki te hiahia tetahi tangata ma matou e tiaki he pepa mana i konei mo te tau kotahi, a ma matou hoki e whakapukapuka, e tuku atu hoki i roto i te meera me whakaatu mai, ko te utu katoa e 6/-

E pouri ana matou mo to matou kaha-kore ki te ta i nga whakamarama i tukua mai e Apirana Ngata, mo nga ture kua oti nei i te Paremete hei painga mo te Maori, ara te Ture Kaunihera me te Ture Marae, engari ka tukua ra-wahotia atu e matou ki o matou kai-tautoko i Turanga ki Torere.

Kaore he whakaahua mo tenei nama o ta tatou manu, engari hei te nama o Tihema ka taia nga whakaahua e wha kua taia e matou a ka nekehia hoki nga wharangi o TE PIPI- WHARAUROA ki te tekau-ma-ono. He tikanga na nga nupepa pakeha te whakanui i te Nama Kirihimete. Mehemea ka kaha te whangai i ta tatou pepa, katahi pea ka whakatuturutia ki te tekau-ma-ono tonu nga wharangi. Huri ake e te iwi mo tenei marama; taria te Nama Kirihimate, kei roto te pukahutanga o te kore- ro — o nga tu korero katoa.

TAKU INOI. Ki te mea tera tetahi he ngoikore atu, Homai he kaha ki a au ki te awhina i a ia ; Ki te mea tera tetahi he matapo atu, Meinga maku ia e arahi kia tata ki a Koe Meinga kia pono aku wawata matemate Kia taea ai te mahi e matea ana e ahau: Kakahuria ki te ora toku whakaaro ngoikore, Meinga au kia rite ki taku i tumanako ai; Meinga kia kite au i roto i Tau mahi He rangimarie, ataahua atu nei i te hari; Arahina au ki waho i a au ano, ki te aroha A meinga au kia rite hei kai-noho mo te rangi, A, nawai ra ko nga mea kakara katoa, ko nga mea pai, Ano ko te kainga pumau o toku wairua. JOHN GREENLEAF WHITTIER.