E KITE etahi o matou hoa i te manu nei • i TE PIPIWHARAUROA i mua mai i te 25 o nga ra o Tihema, te Ra Kirihimete, te ra i whanau ai a te Karaiti ka 1901 tau ka pa- hure nei, ko etahi pea hei muri o te Kirihimete, otira kotahi ano ta matou tangi ki a koutou ka- toa ko te mihi a te pakeha, ko te inihi i whaka- riroia ketia nei e te taringa e te arero Maori, ka kiia " Meri Kirihimete !" E hoa ma, " Meri Kirihimete " ki a koutou katoa ki a matou ano hoki: ko tona whakamaoritanga ia " He Ki- rihimete Hari!" Ae, ko to matou tino hiahia ko ta matou inoi kia mohio te Iwi Maori katoa ki te Kirihimete hari—kia kite koutou i te hari pono e pupu ake nei i te ngakau tatu i te ngakau mahaki i te ngakau kua kite i tetahi okiokinga mona. Otira ahakoa pehea te nui o to matou hiahia o ta matou inoi kia whiwhi koutou ki tenei mea nui e kore rawa koutou e whiwhi ki te kore o koutou ringaringa e totoro ki te tango. Kaore pea te nuinga o te tangata i te mohio ki te nui o te aroha o te Atua i runga i tana tononga mai i tana Tama kotahi ki te ao—i tana kupu. I te haerenga mai o te Karaiti ki te ao ka whakarerea e ia tona kororia i te ringa matau o tona Matua, te tini o nga anahera o te rangi i mahi nei ki a ia, haere mai ana ia ki te ao, " Heoi whakaititia ana ia e ia ano, kua mau ki te ahua o te pononga, kua meinga kia rite ki te tangata." ( Pirip. 2. 7.) " I rite ia ki te tangata," i whanau, i tupu, i hiakai, i hia- inu, i ngenge, i pouri, i tangi, i hari, i whaka- paetekatia e te tangata, i tukinotia, i mamae i mate. I heke iho ia i te rangi kia piki atu a tatou ki reira, i rawakore ia kia rangatira ai tatou, i tangi ia ki a kata ai tatou, i mate ia ki a ora ai tatou. I whakatangata a te Kara- iti kia tata ai te Atua ki te tangata, .kia tata ai te tangata ki te Atua. Ko ia te Takawaenga hei taka i waenganui i te tangata i te Atua—e rua ona taha, (1 Tim. 2. 5.) I korerotia e te tangata te pai o te Tiuka raua ko tana hoa i to raua mauranga i te kakahu maori, kei te pehea ra tatou mo te uhinga a te Atua i te kikokiko ki a ia ano.( Hoa. 1. 14.) Engari ano nga manu o te rangi he kohanga a ratou, nga pokiha he rua o ratou, tena ko te Tama a te Tangata te whai wahi hei takotoranga mo tona mahunga (Mat. 8. 20). I te rawakore rawa o te Karaiti riro ana ma te tangata ke e mahi he kakahu mona ( Rk. 8. 3). Ka kitea i runga i te Whakatangatatanga o te Karaiti te tino nui o te tangata ki te Atua, ara i noho te Atua ki roto i te tangata. Ka kitea hoki i runga i te matenga o te Karaiti te utu nui o te wairua o te tangata—kotahi ano te utu mo te wairua o te tangata ko te oranga o te Tama a te Atua (Mt. 20 28). Kaore pea te tangata i te mohio ki te nui o te utunga o tona wairua e tapaea nei ki a Hatana mo te kore noa iho. He tikanga nui i whakaarohia e te Atua hei take e ora ai te tangata, heoi e te tangata, ri- peneta, tahuri ki te Atua, manakohia tona aro- ha, whakapono, whakawhirinaki ki tana Tama i whanau nei ki te ao i mate nei hoki mou. Whakahokia te aroha ki te aroha, a, e kore e waiho ko te 25 anake o Tihema hei ra haringa mou, engari ka hari koe i nga ra katoa ka " rite rite ki nga ra o te rangi i runga i te whenua." (Tim. 11. 21.)

TE RERENGA O TE ORANGA. Hohoro tonu, hohono tonu te rere a te awa o te ora A he poto kau te rerenga mo tatou katoa, E rere ana etahi i te aio i te rangimarie, Ko etahi ia e poaina ana e te mamae e te pouri. He tokomaha e mauiui ana i te roa o te huarahi, A e koingo ana kia tau ki te okioki, Otira e heke tonu ana te tai o te takiwa, E kore rawa tetahi e mahue i a ia ki muri. Ahakoa te tini o te waka i te kahu o te wai E totohu ana i te pikaunga tangata, Rite tonu ta ratou ki te wa i whakaritea Ko te wahapu o te mate hei taunga mo ratou.