'Na, ano te pai, ano te ahuareka, o te nohoanga o nga teina o nga tuakana i runga i te whakaaro tahi. " —Waiata 133, 1.

I te kimi ahau i roto i te Karaipiture, e pai ranei te Atua ki te wehewehe. Kimihia noatia ake, i te timatanga taea noatia te mutunga, na, heoi ano taku e kite ai, e pai ana te Atua ki te whakakotahi. Na Hatana te wehewehe, na te Karaiti te whakakotahi, koia hoki a te Karaiti i haere mai ai ki tenei ao, he Hepara pai, hei huihui i nga hipi katoa kua whakamararatia, kia meinga hei kahui kotahi. Tera ke te mahi a Hatana, he whakamarara i nga hipi. (Hoani 10, 12, 16).

Kua kitea e koutou tenei tikanga. Kua korerotia e kou- tou tenei tikanga. Kua korerotia nuitia e koutou tenei waiata, —"Ano te pai, ano te ahuareka o te nohoanga o nga teina o nga tuakana i runga i te whakaaro tati. "

Na, te rerenga mai o nga tangata o ia iwi, o ia iwi, Wai- kato, Hauraki, Ngatihaua, Ngaiterangi. Ngatiwhakaue, Wakatohea, Ngatiporou, Ngatikahungunu, ki tenei Hui i runga i te whakaaro tahi. Ano te pai, ano te ahuareka, o tenei tu noho, o te noho tahi.

Kotahi te mea i hapa. Na, ko te pakeha hei noho tahi. Kahore ano kia ata rite te kupu a to tatau waiata. Te tua- kana kua tae mai, te Teina kua noho atu. Me noho tahi te teina, raua ko te tuakana.

Ko wai te Tuakana? na, ko koutou ko nga Tamariki a Hema. Kowai te Teina, na ko matou, ko nga tamariki a Tapeta. Me noho ke ranei matou? me noho tahi ranei? tena koa, hurihia mariretia taku patai.