NAMA 36. HASTINGS. Akuhata 1, 1924 TE TOA TAKITINI AWHEA ANO HE PIHOPA MO TE MAORI? KANUI te hiahia o Te Toa Takitini kia tuhituhi mai nga tangata marama mo tenei take, kia waiho ai hei take whiriwhiri ma o tatou hapu katoa. Kua maha rawa nga tau o tenei take e korerotia ana, engari he korero noaiho, kaore ano kia kokiritia ki te aroaro o tetahi huihuinga whai mana hei ata whakahaere i tenei take. He maha tonu nga pakeha whai-whakaaro ki te iwi Maori e mea ana tena e kaha ke atu te tipu o te whakapono i roto i te iwi Maori, mehemea ka tukuna atu ki te iwi Maori te mana whakahaere i tona Hahi. Kaore he whakaaro penei kia wehe mai tatou i te Hahi o Niu Tireni. Engari kia kiia tatou he Hahi motuhake, he Hahi tamahine na te Hahi, na te Hahi o Ingarangi, kia riro ma tatou ma te iwi e whakahaere nga take katoa e pa an ki to tatou Hahi. Mehemea ka tirohia e tatou nga whakahaere o era atu iwi o te ao, ka marama tatou ki te tikanga o te kupu nei " Hahi Motuhake. " Ka tae nga kai-kauwhau pakeha o te Rongo-pai ki Haina, ki Inia, kia Tiapana, ka mahi nui ratou, a he maha nga tau ka huri etahi wahanga nui o aua iwi ki te whakapono. Inaianei kua tu etahi Hainamana hei Pihopa, a kua takoto hoki te kaupapa mo to ratou Hahi. Kua whakakotahitia te Hahi, kua kiu ko te Hahi o Haina. Kua kore i whakaaetia kia maha nga Hahi, penei me tatou i Nui Tireni nei. He mea karanga he hui nui o nga Hahi i Haina, ki te whiriwhiri i nga kaupapa e taea ai te whakakotahi o nga Hahi Kua tu nga Pihopa Tia- pani. Kua kite a Ngati Kahuhunu a Te Arawa i te Pihopa o Inia ara i a Pihopa Ataria. E toru hoki nga Pihopa mangu- mangu kei Awherika. Nui atu nga whakamihi mo te kaha o aua Pihopa, mo te marama ki te whakatakoto whakaaro, ki te whakahaere tikanga. Kaua tatou hei whai ko te honore o te ingoa nei " Pihopa Maori. " Engari mehemea ma tenei tikanga e kaha ai te tipu o te whakapono i roto i te iwi Maori, kaati me mahi nui tatou mo tenei tikanga, me inoi hoki kia aratakina o tatou whakaaro e te Wairua o te Atua. He karanga pea tenei na te Atua i a tatou i te iwi Maori kia hikoi whakamua. Mehemea nona te reo, kaua tatou hei turi ki tana karanga.