HIKURANGI MAUNGA. (Na Ihaia Hutana. )

HEI konei ra i Hikurangi maunga te whakamaunga atu o te ihu waka, te puputanga o te tangata i te tai a Ruatapu, ka tupu ai ano he tipu na te Atua.

He moemoea na te hinengaro matotoru, nga whakarerenga iho o nga tikanga ataahua, me nga mahi pai ana tahitotia ki roto i te pirau. Tahuri ake nei ko o koutou koroua, kuia, e tapapa wairua mai ana i te paepae o te tatau o te whatitoka o Meri Whare-karakia. Na ratou nei te mahi nui. te tope i nga ururua, te tahoro i nga maunga, te whakatika i nga wahi ko- pikopiko, te tahi i te marae, te whariki i te whare mo te manu- hiri.

Haunga ia nga tamariki wawahi taha o te ao hou. Kopiko atu. kopiko mai. Kei nga koroua, kuia, i roto i nga whare umu e kopae ana.

Hei konei ra Te Koroneho, korua ko Te Kairakau nga ko- pura o te pito ora o te purapura i onokia e o koutou matua.

Tenei ra kua kai, kua makona, i te mana o te kai. Te aroha ki nga matua, te aroha ki a tatou tamariki i hinga atu, ki roto i te mura o te ahi. " Hei karauna mo nga koroua nga tamariki a nga tamariki, te kororia o nga tamariki ko o ratou matua. "—Whakatauki (17: 6).