Kanui te whakamihi o Te Toa Takitini ki te marama o nga, whakahaere a enei o tatou hapu kua whakahuatia i runga ake nei, i whakaae ai te Kawanatanga kia tu mei Poari hei whaka- haere i nga moni e puta mai ki a ratou i ia tau 5 a tau. Mehemea i whakahaeretia kuaretia e nga uri o enei ra. tera pea e peneitia me nga moni o nga whenua e hokona nei. a pau tonu ake i te heremanga kotahi. Ko tenei kaore he mimititanga o enei puna. ka waiho tonu hei manaakitanga i tenei whakatupuranga tae noa ki nga whakatipuranga e tipu ake nei. me nga whakapaparanga kei te haere mai. Kaore tatou e mohio ka pehea ra te ahuatanga o te iwi Maori a tona wa e takoto mai nei. Tena ranei e penei tonu te manaaki pai mai a o tatou hoa pakeha, tera ranei e penatia me nga mangumangu o Amerika, o te tonga ki Awherika. . Noreira e tika ana kia titiro whakamua tatou. Kei nga whaka- haere a nga Poari nei te ora mo o ratou na uri. Kei a ratou te arawhata hei taenga atu mo o ratou uri ki nga kura ki nga kareti. ki nga mahi ako-a-ringaringa ki nga mahi paamu me era matau- ranga o te pakeha.

E nga iwi o te Motu, kia whai whakaaro ano ra ki o tatou uri, kia aroha ki te iwi maana e hapai o koutou ingoa i muri i a koutou a tatou tamariki a tatou mokopuna. He waimarie to Te Arawa to Tuwharetoa ki ona moana engari ko ona whenua kaore he painga. Ko etahi o tatou hapu kaore he moana engari ko nga whenua he tino momona. He aha te he o te wehi i tetahi wahi o te whenua e hokona ana. ka waiho ai hei tahua tiaki mo o koutou uri? Nui atu te pai mo te iwi Maori katoa mehemea ka taea te whakaara he Poari tiaki mo ia hapu mo ia hapu.