Kei roto tatou i nga ra Reneti e whakahaua nei te Haahi me nohopuku tatou. Ko te mehua o enei ra kei te rakaunui- tanga o te marama i a Maehe. I etahi wa ka heke atu ki a Aperira. Ko te 40 ra i muri o te rakaunuitanga nga ra Reneti. He ra nohopuku enei, he ra pouri. E whakahau ana te Haahi kia puritia enei ra. ara kia whakauru tahi te pouri, me nga mamaetanga o te Karaiti. Kei te tangata ano ia te mehua o taana pupuri i enei whakahaunga. Kaore a te Haahi whai ture mo tenei taha. Ko etahi tangata whakangawari ai. mutu rawaatu ai ranei te tangotango atu ki tetahi mea e tino matenuitia ana. Ko etahi ano tino nohopuku ai mo tetahi wa. Ahakoa takaro noaiho te pupuri a te tangata i enei ra, ko te mea nui ke ko Te Wairua Maru, hui tahi ki te peehi i te kikokiko me ona hihiritanga. I te mea ka noho tahi nei tatou me te Karaiti ki Tona rangatiratanga, e tika ana kia uru tahi tatou ki Ona mamaetanga mou nei, moku mei te take. He whakaakoranga tawhito tenei na te Haahi ka nuku atu i te 1, 400 tau. I mea a Iranui (Irenaeus) i te raruraru o te whakanui i te ra Aranga "Ehara i te mea ko te ra Aranga anake i raruraru; ko te nohopuku ano hoki. Ko etahi i mea kia kotahi te ra nohopuku, ko etahi i mea kia rua, ko etahi i mea kia toru, kia nuku atu ranei. " I mea a Hokaratea (Socrates): "Nohopuku ai nga Romana e toru wiki i mua atu o te ra Aranga, engari kapea ai te Hapati me te ra o te Ariki. " Nga Kariki me te hunga o Arehanaria nohopuku ai 15 ra o te ono wiki. Korero ai a Orikena (Origen) mo te nohopuku i nga ra e 40 i mua o te ra Aranga.. Na Kerekari te Nui (Gregory the Great) i tautapa mai ta te Haahi pupuri i nga ra Reneti, e ono rau tau i muri iho i a te Karaiti.